ဘိုးတော်ဘုရား၏ အချစ်ဆုံးမြစ်တော် ညောင်ရမ်းမင်းသား(စကြာမင်းကလေး)

ခရစ်နှစ် ၁၈၁၂၊ ၉ လပိုင်း၊ ၂၄ ရက်တွင် အမရပူရ နန်းတော် ဘုရင့်ဥယျာဉ်တော် အတွင်းရှိ ကသစ်ဖြူ ပင် ၏ အရွက်များ အကိုင်းများမှ ရေများ ပန်းပန်းထွက်သဖြင့် ဘိုးတော်ဘုရားကိုယ်တော်တိုင် သွားရောက်ကြည့်ရူ၏။ ထိုစဉ်က အမရပူရနေပြည်တော် တ၀ှက်တွင် မကြုံ ဖူးသော ငလျင်ငယ်များစွာ အကြိမ်ကြိမ် လူပ်လေ့ ရှိ ၏။ ပညာရှိများက စစ်ကိုင်းမင်းသား ၏ မိဖုရား ဆင်ဖြူ မယ် တွင် ဘုန်းကံကြီးသူ တဦး သန္ဓေယူနေကြောင်း တွက်ချက်ကြ၏။ ဘိုးတော်ဘုရားအိပ်မက်၊ ငလျင်နိမိတ်၊ များအပေါ်မူတည်ပြီး တွက်ကြခြင်း ဖြစ်၏။


ခရစ်နှစ် ၁၈၁၂ နှစ်ဦးပိုင်းတွင် ဘိုးတော်ဘုရားသည် နံနက်ညီလာခံတွင် အိမ်မက်ဆန်းတခု ကို နိမိတ်ဖတ်ခိုင်းလေသည်။ ထို ညီလာခံတွင် မိန့်တော်မူသည်မှာ " ငါသည် ညဥ့်သန်းခေါင်ယံ အချိန်တွင် အိပ်မက်မြင်မက်သည်မှာ ငယ်စဉ်က အလွန်ချစ်ကျွမ်းဝင်ခဲ့သော ပြည်မြို့  န၀င်းအရပ်တွင်နေသော မောင်ရွှေအောင် (ပထမံ ဦးအောင် (ခေါ်) ဘိုးဘိုးအောင်) သည် နန်းတော်တွင်း ၀င်လာ ခစား၏။ အဘယ်ကိစ္စ ရှိသနည်းဟု မေးရာ မောင်ရွှေအောင်က " မင်းတရားကြီး ၊ မြေးတော်ကြီး အိမ်ရှေ့မင်းသား ကို ဆက်သရန် ဝိဇ္ဇာမဟိဒ္ဒိ ဆေးရုပ်ရှင် တို့ကို သရေခေတ္တရာမြို့ အနီး မြင်ပါစေတီတော် တွင် စီရင်ပြီးစီးပြီး ပါသဖြင့် ယူဆောင်ခဲ့ပါသည်။ မြေးတော်ကြီး အိမ်ရှေ့မင်းသားကြီး ကို ဆက်သလိုသဖြင့် မင်းတရားကြီး အမိန့်တော်ကို နာခံလိုသောကြောင့် နန်းတော်သို့ ၀င်ခဲ့ပါသည် ဟု ငါအား" လျှောက်၏။

ငါသည်လည်း ငါ၏မြေးတော်၊သားတော်များကို ဆက်သရန် ဆိုသဖြင့် အလွန်ဝမ်းမြောက်ပြီး ခွင့်ပြု လိုက်၏။ ထိုတခဏအတွင်း ငါ၏ အမြင်အာရုံတွင် မောင်ရွှေအောင်မှ မြေးတော်ကြီး ထံ ထိုဆေးရုပ်ကို ဆက်သနေရင်း အလွန်လှပသော သတိုသား(ကလေးငယ်) တဦး မောင်ရွှေအောင် လက်ပေါ်တွင် ပေါ်လာပြီး မြေးတော် ကြီးကို ဆက်သ တယ်လို့ အိပ်မက်မြင်မက်၏။ ထိုနောက် စစ်ကိုင်းမင်းသား နှင့် မိဖုရား ဆင်ဖြူ မယ် တို့၏ အနောက်ဆောင် မီးလောင်တယ်လို့လည်း ဆက်မြင်မက်၏ ဟု မိန့်တော်မူလေသည်။

ဆရာချုံ ၏ ပန်းချီ (ကုန်းဘောင်ခေတ်) 

ပညာရှိတို့လည်း မင်းတရားကြီး၏ ဘုန်းတော်ကြောင့် စစ်ကိုင်းမင်းသားတို့တွင် မင်းကြီးကဲ့သို့ ဘုန်းကံကြီးသော သားတော်တပါး ထွန်းကားပါမည်၊ အနောက်ဆောင် မီးလောင်သည်ဟု မက်သဖြင့် မိဖုရား (သို့) စစ်ကိုင်းမင်းသား အတွက် စိတ်မအေးဖွယ်ရာ ဖြစ်လာတတ်ပါသည် ဟု နိမိတ်ဖတ် လျှောက်တင်ကြလေ၏။ ထို နိမိတ်ဖတ်သည့် နေ့မှ စပြီး နေ့စဉ်လိုလို ငလျင်ငယ်များစွာ လူပ်လေ့ရှိလေသည်။

ထိုနှစ် ၁၀ လပိုင်း ၂၇ ရက်နေ့တွင် စစ်ကိုင်းမင်းသား နှင့် ဆင်ဖြူ မယ်တို့မှ သားဦးရတနာ မွေးဖွားလေ၏။ ဆင်ဖြူ မယ်သည် ၇ ရက်မြောက်သောနေ့တွင် နတ်ရွာစံလေသည်။ ဘိုးတော်ဘုရားသည် မြစ်တော်လေးကို အလွန်ချစ်မြတ်နိုးလေ၏။ ထိုမြစ်တော် မွေးသည့်နေ့မှစပြီး ဘိုးတော်ဘုရားသည် ခေါင်းကိုက်ဝေဒနာ စွဲကပ်လေ၏။ ဆေးကုသော်လည်း မပျောက်သဖြင့် ပရောဟိတ်များကို မေးလေရာ ပရောဟိတ်များစွာမှ အကြံများ ပေးကြရာ နောက်ဆုံးတွင်မှ အယူတော်မင်္ဂလာ ဦးနိုးမှ မြစ်တော် ကို လက်ဖွဲ့ လျှင် ပျောက်မည်ဟု လျှောက်တင် လေရာ မြစ်တော်ကို ညောင်ရမ်းမြို့  လက်ဖွဲ့ ကြောင်း အမိန့်တော်ပြန်သည်နှင့် ခေါင်းကိုက်ရောဂါ ပျောက်လေ၏။

ကုန်းဘောင်ခေတ် ပန်းချီ လက်ရာ 
ထိုသို့ တိုက်ဆိုင်သော အကြောင်းများကြောင့် ဘိုးတော်ဘုရား သည် မြစ်တော်ကို အလွန်ချစ်လေ၏။ ထိုပြင် ရွှေနန်းတော်အတွင်း ငွေရောင်(အဖြူ ရောင်) အဆင်းရှိသော မြင်းတကောင် ကိုလည်း မြစ်တော် မွေးချိန်နှင့် အတူ ဘုရင့်မြင်းတင်းကုပ်တွင် မွေးသဖြင့် ဘိုးတော်ဘုရားမှ ထိုမြင်းငယ်လေးကိုလည်း လက်ဖွဲ့လေ၏။ ထိုမှ အားမရသေးသဖြင့် မြစ်တော် အတွက် မြ ဖြင့် ပြု လုပ်ထားသော ပုခက်တော် ကို လက်ဖွဲ့ ချင်သဖြင့် ငွေတိုက်တော်မှ ငွေ ရှစ်သိန်း ထုတ်စေပြီး ယိုးဒယားသို့ မြ ဖြင့် ပြု လုပ်ထားသော ပုခက်ယာဉ် သွားရောက် ပြု လုပ်စေလေ၏။

ထို မြ ပုခက်ယာဉ် အဖွဲ့ ကို ကြီးကြပ်ရန် အမတ်ကြီး ဦးပေါ်ဦးကို တာဝန်ပေးရာ ဦးပေါ်ဦးမှ ဘုရင် ပါး မ၀သေး ဟု ဆိုသည်ကို နားတော် ပေါက်ကြားသဖြင့် သိန္ဒီမြို့ သို့ နယ်နှင်ဒဏ် ပို့ခံရလေ၏။ ထိုနောက် မြ ပုခက် ၀ယ်ရန် အမတ်ကြီး မဟာမင်းလှရာဇ ကို သွားရောက်စေလေသည်။ မှူးမတ်တို့မှလည်း မြစ်တော် ကို လက်ဖွဲ့ များစွာ ဘုရင်နှင့် အတူ လက်ဖွဲ့ ကြသဖြင့် ညောင်ရမ်းမင်းသားလေးသည် မွေးပြီးသည်နှင့် ရွှေငွေများစွာ ပိုင်သော သဌေးမင်းသားလေး ဖြစ်လာတော့လေ၏။

၇ ရက်အတွင်း မိခင် ဆင်ဖြူ မယ် နတ်ရွာစံသဖြင့် ညောင်ရမ်းမင်းသား ကို ကြည့်ရူစောင့်ရှောင်ရန် မြတောင် မင်းသမီး ( စစ်ကိုင်းမင်းသား ၏ ညီမ) မှ တာဝန်ယူရလေ၏။ ဆင်ဖြူ မယ် မင်းသမီး ငယ်စဉ်က ဘိုးတော်ဘုရား သည် ဆင်ဖြူ မယ် မင်းသမီးလေးကို ရင်ခွင်ပိုက်ကာ ဆင်ဖြူ  ချိူးတော်ရေ ခေါ်နေသည်ကို ကြည့်နေစဉ် ဆင်ဖြူ မှ ကြာပန်း ကို ခူးကာ မင်းသမီးလေးကို ဆက်သလေ၏။ ထိုကြောင့် ဆင်ဖြူ မယ် မင်းသမီး ဟု ဘိုးတော်ဘုရား မှ ကင်ပွန်းတပ် ခေါ်ခြင်းဖြစ်သည်။

မှတ်ချက်။  ။ ဆင်ဖြူ မယ်မိဖုရား နတ်ရွာစံ ရခြင်း အကြောင်းကို တချိူ့ သမိုင်းဆရာများမှ နန်းမတော် မယ်နု ကြောင့် လည်း ပါကြောင်း ရေးသားကြသည်။ ဆင်ဖြူ မယ် မီးဖွားပြီးနောက် စစ်ကိုင်းမင်းသား သည် တရက်သာ လာကြည့်ပြီး နောက်နေ့ များတွင် ထိုစဉ်က စစ်ကိုင်းမင်းသား ခေါ်ဆောင်လာသော ၁၅ နှစ်အရွယ် မယ်နု ဟု ခေါ်သော အပျိူ တော် နှင့် သာ ပျော်ပါးနေလေ၏။ ထိုအကြောင်းကြောင့် ဆင်ဖြူ မယ် စိတ်အားငယ်သည်က တကြောင်း၊ မီးတွင်းက ရသော ဒဏ်များကြောင့် တကြောင်း နတ်ရွာစံရသည်ဟု ရေးသားကြ၏။
Share:

No comments:

Post a Comment