စစ်ချီရင်း လမ်းခုလတ်တွင် နတ်ရွာစံခြင်း

ညောင်ရမ်းမင်းသည် ဗန်းမော်စော်ဘွားကို အောင်နိုင်ပြီးသည့်နောက် အင်အားကြီးသော မိုးကောင်းသို့ စစ်ချီရန် စစ်ပြင်ဆင်ပြန်လေသည်။ မိုးကောင်းစော်ဘွားလည်း ချီတက်လာသော ညောင်ရမ်းမင်း၏ တပ်ကို ပြန်လည်ခုခံလေ၏။ သို့သော်လည်း အင်အားမမျှသဖြင့် ရူံးနိမ့်ကာ တပ်ပျက်လေသည်။
မိုးကောင်းစော်ဘွားကိုလည်း အရှင်ဖမ်းမိလေသည်။



ညောင်ရမ်းမင်းသည်အေဒီ ၁၆၀၅ ဇူလိုင် ၁၁ တွင် ဆောက်လုပ်ပြီးသော စံရွှေအိမ်တော် တွင် အိမ်တော်တက်ပွဲ ကျင်းပတော် မူလေသည်။ ထိုရွှေစံအိမ်တော်တွင် အစည်းအဝေးလုပ်ပြီး မိုးမိတ်၊ အုန်းပေါင်သိန်းနီ၊သီပေါ များကို သိမ်းပြီးလျှင် အရှေ့ရှမ်းပြည် (ကျိုင်းတုံ) ကို တိုက်မည်၊ ပြီးလျှင် တောင်ငူကို စစ်ချီမည် ဟု မိမိအလိုရှိသည်များကို မိန့် ကြားလေ၏။

 ညောင်ရမ်းမင်း၏ သားတော်အကြီး အိမ်ရှေ့မင်းသား မှ ထိုအရေးကိုထောက်ခံကြောင်းလျှောက်ပြီး
 မိမိကိုယ်တိုင်ဦးဆောင်ပြီး တိုက်ပါမည်ဟုလျှောက်ရာ ကျန်ရှိနေသော သားတော်များလည်းထိုနည်းတူ
လျှောက်ကြလေ၏။ညောင်ရမ်းမင်းလည်းမိမိသားတော်များကို ဗိုလ်မှူးခန့်ကာ သိန်းနီနှင့် သီပေါကို တိုက်ရန် ချီတက်လေသည်။မိုးမိတ်စော်ဘွားမှာမူ တောင်ကုန်းပေါ်မှ နေကာ အင်းဝတပ်၏အင်အား ကို ကြည့်ပြီး နိုင်ရန်မသေချာသဖြင့် သံတမန်များလွှတ်ကာ အညံခံလေ၏။ ထိုမှ သိန်းနီကို ဆက်လက် ချီတက်လေ၏။သိန်းနီစော်ဘွား၏တပ်များလည်း လမ်းခုလတ်တွင် ကြိုပြီးတိုက်သဖြင့် ညောင်ရမ်းမင်းလည်း အလျင်အမြန် စစ်ဝတ်တန်ဆာများကို ၀တ်ကာ ကြိုတိုက်နေသော သိန်းနီစော်ဘွားတပ် သို့ စီးတော်ဆင်ဖြင့် ၀င်တိုက်လေ၏။

အင်းဝဘက်မှ ဖိတိုက်သဖြင့် သိန်းနီစော်ဘွားတပ်မခံနိုင်ဘဲ ဆုတ်ရလေ၏။ထိုစစ်ပွဲအပြီးတွင်
 နောက်တနေ့တွင် ညောင်ရမ်းမင်းသည် နေထိုင်မကောင်းဖြစ်လာသဖြင့် လူယုံတော်သက်တော်စောင့် ဗိုလ်မှူးဂါမဏိကို ဘုရင်အ၀တ် အစား ၀တ်စေပြီး စီးတော်ဆင်ကို စီးစေလေသည်။

 ညောင်ရမ်းမင်းမှာမူ မောင်းမတော်တို့ကို သယ်ဆောင်သော လှည်းတော်ကြီးတွင် လှဲကာနေလေ၏။ ထိုအကြောင်းကို အမတ်တချို့သာ သိလေသည်။ညောင်ရမ်းမင်းလည်း ရုတ်တရုက်အဖျားတွေတက်လာ သဖြင့် နန်းတွင်းသမားတော်များမှ နေပြည်တော်သို့ ပြန်ရန် လျှောက်ထားကြလေ၏။
မင်းကြီးလည်း သားတော်အိမ်ရှေ့စံကို ခေါ်ကာ သိန်းနီကို အနိုင်တိုက်ရန် အမိန့်တော်ပေးပြီး အင်းဝသို့ ပြန်လေသည်။

သားတော်အိမ်ရှေ့စံလည်းနောက်တနေ့တွင် သိန်းနီမြို့ကို အလုံးအရင်းဖြင့် တိုက်ရာ နိုင်တော်မူလေ၏။ ထိုနိုင်သော သတင်းကိုပေးရန် အိမ်ရှေ့မင်းသားသည် အလျင်အမြန်ချီတက်ပြီး အင်းဝသို့ ပြန်ဆုတ်နေသော ညောင်ရမ်းမင်းထံ လျှောက်တင်ရာ မင်းကြီးမှ သဘောတော်ကျပြီး ဆုလာဒ်များ ချီးမြှောက်လေ၏။ညောင်ရမ်းမင်းသည် အင်းဝသို့ ဆုတ်လာရာ ရွှေသာလျောင်းတောင်သို့
ရောက်လျှင် ထိုနေရာတွင် စခန်းချစေလျက် မိမိ၏ သားတော်များကို ဆုံးမ စကားများ ပြောကြားလေ၏။ ထိုသို့ ဆုံးမစကားများ ပြောကြားပြီး ညဉ့်သုံးချက်တီးတွင် နတ်ရွာစံလေသည်။ ညောင်ရမ်းမင်း နတ်ရွာစံသော ရက်သည် အေဒီ ၁၆၀၆ ဖေဖော်ဝါရီ ၂၁ ဖြစ်လေ၏။
Share:

No comments:

Post a Comment