နန္ဒဘုရင် ၏ မအောင်မြင်သော ယိုးဒယား တိုက်ပွဲ

အေဒီ ၁၅၈၅ ဧပြီလတွင် ဟံသာဝတီနန္ဒဘုရင် သည် စစ်တပ်အင်အား တစ်သိန်း နှစ်သောင်းကျော်ကို အိမ်ရှေ့မင်းသား အား ဦးဆောင်စေပြီး ယိုးဒယားသို့ ထပ်မံချီတက်စေလေသည်။ ဗြနရစ်လည်း လမ်းခုလတ်တွင် ဆီးကြိုပြီး ခုခံ၏။ သို့သော်လည်း မခံနိုင်ဘဲ တပ်ကို ဆုတ်ကာ စုကလိခံတပ်တွင် စခန်းချပြီးနေလေသည်။ ခံတပ်တွင် မြတပူ၊စိန်ပြောင်း အမြှောက်ကြီးများ အထပ်ထပ်ချထားသဖြင့် ဟံသာဝတီတပ်များ အနားကပ်မရဖြစ်နေလေ၏။

ခံတပ်ကို ၀ိုင်းရံပြီး တလရှိလျှင် အိမ်ရှေ့မင်းသားမှ ခံတပ်ကို မထိုးဖောက်နိုင်သဖြင့် အမတ်များ၏ အကြံပေးချက်အတိုင်း ဆုတ်ခွာဟန်ပြုပြီး၊ ခံတပ်မှ ဗြနရစ် ထွက်တိုက်အောင် ပြုလေ၏။ဗြနရစ် လည်း အိမ်ရှေ့ဥပရာဇ ဆုတ်ပြီဟု ကြားလျှင် ချက်ခြင်း ခံတပ်မှ ထွက်ကာ တိုက်လေ၏။ ဟံသာဝတီတပ်လည်း ဆင်ထားသည့်အကွက်အတိုင်း ပြန်လည်ခုခံတိုက်ခိုက်လေ၏။ သို့သော် ယိုးဒယားဘက်မှ ဖိတိုက်သဖြင့် ဟံသာဝတီ၏ တပ်မခွဲဖြစ်သော ဗညားပရံ ဦးဆောင်သည့် တပ်မကြောင်း ပျက်လေသည်။ အိမ်ရှေ့မင်းသားမှ ၏ အလယ်တပ်မကြောင်း ချီတက်လာသည်ကို ဗြနရစ်မြင်လျှင် တပ်ကို ခံတပ်သို့ ဆုတ်လေ၏။

အိမ်ရှေ့မင်းသားလည်း ဆက်လက်တိုက်ခိုက်လိုစိတ်မရှိတော့သဖြင့် ခမည်းတော် နန္နဘုရင်မှ ပြန်ရန် အမိန့်တော်မရသော်လည်း ဟံသာဝတီတပ်ကို ပြန်လည် စုစည်းပြီး ယိုးဒယားမှ ပြန်လေ၏။ အေဒီ ၁၅၈၆ ဇူလိုင်လတွင် ဟံသာဝတီနေပြည်တော်သို့ ပြန်ရောက်လေ၏။ နန္ဒဘုရင်လည်း သားတော်ကို အမျက်တော် ထွက်ခြင်းမရှိဘဲ ကောင်းစွာအနားယူစေလေ၏။ ထိုနောက် လွှတ်တော်တွင် မှူးမတ်များနှင့် တိုင်ပင်ပြီး မိမိကိုယ်တိုင် ချီတက်မည်ဟု အမိန့်တော်ချလေသည်။ 

တတိယအကြိမ်စစ်ပွဲတွင်လည်း ယိုးဒယားမြို့တော်ပတ်လည်သာ ၀ိုင်းရံထားနိုင်ပြီး မြို့တွင်းမှ စိန်ပြောင်း၊ 
မြတပူအမြှောက်ကြီးများဖြင့် ပစ်ခတ်သဖြင့် ဟံသာဝတီတပ်များ အနားမကပ်နိုင်ဘဲ ဖြစ်ရလေ၏။ ၅ လ ကြာအောင် ၀ိုင်းရံထားရာ ဟံသာဝတီတပ်သားများ စားနပ်ရိက္ခာရှားပါးလာလေ၏။ ထိုအကြောင်းကို 
ဗြနရစ်သိလျှင် လေးရက်တစ်ကြိမ်၊ ငါးရက်တစ်ကြိမ် မြို့တွင်းက ထွက်ပြီး တိုက်လေရာ ဟံသာဝတီ ရဲမက်တော်တို့ အရှအန အသေအပျောက် များလေ၏။ 

နန္ဒဘုရင်လည်း နောက်ဆုံး လက်လျှော့ကာ လူနာလူဖျားများကို အလျင်ချီစေပြီး၊ မိမိမှမူ ဟံသာဝတီ တပ်မကြီးကို ဦးဆောင်ကာ အေဒီ ၁၅၈၇ ဧပြီလ ၉  ရက်တွင် ဟံသာဝတီသို့ ပြန်လည် ဆုတ်ခွာတော် မူလေသည်။ နန္ဒဘုရင် ဆုတ်ခွာတော်မူပြီဟု ဗြနရစ်ကြားလျှင် မြို့တော်မှ ထွက်ကာ နန္ဒဘုရင်နောက် အမှီ လိုက်လေ၏။ သို့သော် နန္ဒဘုရင်၏ တပ်ကိုလိုက်နေစဉ် တောင်ငူနယ်စား မင်းရဲကျော်ထင် ၏ တပ်မှ ယိုးဒယားမင်း၏ တပ်ကို ကြားဖြတ်တိုက်သဖြင့် မခံနိုင်ဘဲ ယိုးဒယားသို့ ပြန်ဆုတ်ခွာလေသည်။

နန္ဒဘုရင်သည် အေဒီ ၁၅၈၇ ဇွန်လ ၈ ရက်တွင် ဟံသာဝတီနေပြည်တော်သို့ ပြန်ရောက်လေသည်။


Share:

No comments:

Post a Comment