အင်းဝ ဘုရင် ဒုတိယမင်းခေါင်

ဘုရင် မဟာသီဟသူရ သည် ဥာဏ်ပညာနှင့် ပြည့်စုံသော မင်းဟု သမိုင်းဆရာများ မှတ်တမ်းတင်ထား၏။ သူ့လက်ထက်တွင် အင်းဝနေပြည်တော်တ၀ိုက် သာယာဝပြောသည့်အပြင် ဗုဒ္ဓဘာသာသာသနာ ကိုလည်း အထူး ထောက်ပံ့ခဲ့ကြောင်း မှတ်တမ်းများက ဆို၏။ သက်တော် ၅၄ တွင် နတ်ရွာစံလေ၏။
နတ်ရွာစံသော် သားတော် အိမ်ရှေ့မင်း သည် မင်းခေါင်ဟူသော အမည်ခံယူကာ အင်းဝရာဇာဝင်တွင် ဒုတိယမင်းခေါင် ဟု ထင်ရှား၏။ ဒုတိယမင်းခေါင် နန်းတက်သော် အင်းဝနေပြည်တော်တွင် ကောလဟလ တခုကြောင့် နေပြည်တော်တခုလုံး အုတ်အုတ်ကျက်ကျက် ဖြစ်ပွားလေ၏။ ဘုရင် မဟာသီဟသူရ တွင် သားတော် ၃ ပါး ရှိ၏။ သားတော်အကြီးဆုံးအား အိမ်ရှေ့အရာ ပေးပြီး သားတော် အလတ် အား စလင်း နှင့် ဆယ်မြို့ ကို ပေးကာ သားတော်အငယ် ကိုမူ ရမည်းသင်းအား ပေးပြီး စားစေလေ၏။

ထို သားတော် သုံးပါး တွင် သားတော်အလတ်သည် လုပ်ရည်ကိုင်ရည် ရှိကာ ထက်မြက်သဖြင့် 
နေပြည်တော်တွင် သားတော်လတ် သတင်းမှာ လူတိုင်းပါးစပ်ဖြားတွင် ရှိနေလေ၏။ ဘုရင် မဟာသီဟသူရ နတ်ရွာလားပြီး ဒုတိယမင်းခေါင်နန်းတက်သော် လူငယ်တဦးမှ စလင်းစား သတိုးရာဇမှ အင်းဝနေပြည်တော် သို့ချီတက်လာပြီး နန်းလုတော့မည် ဟု သတင်းလွင့်ရာ နေပြည်တော်တခုလုံး အုတ်အုတ်ကျက်ကျက် ဖြစ်ရလေ၏။ 
                                  (အင်းဝခေတ် မင်းစိုးရာဇ တို့ အသိုင်းအ၀ိုင်း ပြ ပန်းချီ )
ဒုတိယမင်းခေါင်လည်း ထိုအကြောင်းကို စုံစမ်းစေရာ ကောလဟာလမှန်း သိသဖြင့် ထို သတင်းစဖြန့် သော သူကို ရှာစေလေ၏။ ထိုသို့ စစ်ရင်း စစ်ရင်း သတင်းဖြန့်သော သူအား ဖမ်းမိရာ ဘုရင် ကိုယ်တော်တိုင် စစ် လေ၏။ စစ်ပြီး ဘုရင်မှ အမျက်ထွက်သဖြင့် ကွပ်မျက်လေ၏။ 

ဒုတိယမင်းခေါင် သည် အေဒီ ၁၄၈၀ တွင် နန်းတက်ရာ အေဒီ ၁၄၈၁ တွင် ကောလဟာလ အတိုင်း ညီလတ် နှင့် ညီငယ်မှ ဒုတိယမင်းခေါင်ကို ပုန်ကန် လေ၏။ ညီလတ် ဖြစ်သော စလင်းစားမှ အင်းဝထီးနန်း အား သူအား ပေးရန် တောင်းဆိုလေ၏။ မပေးပါလျှင် အင်းဝ အထိ ချီတက်ပြီး တပြည်လုံး မီးတောက် စေမည်ဟု စာစေလေ၏။ဒုတိယမင်းခေါင်လည်း ပြန်လည်ခုခံတိုက်ခိုက်ရန် စစ်အင်အား အလုံးအရင်းကို ပြင်ဆင်လေ၏။ 

ဒုတိယမင်းခေါင်လည်း အလုံးအရင်းဖြင့် ရမည်းသင်းသို့ အရင် ချီတက်၏။ ထိုစစ်ပွဲတွင် သက်တော်ရှည် အမတ်ဖြစ်သော ရာဇသင်္ကြန်မှ ဦးဆောင် တိုက်ခိုက်လေ၏။ ရမည်းသင်းအပိုင်ဖြစ်သော ရေလွှဲငါးခရိုင် ကို သိမ်းပိုက်နိုင်လေ၏။ 

ရမည်းသင်းစားလည်း စစ်သူကြီး မင်းရဲကျော်စွာ အား ချီတက်ခုခံ စေလေသည်။ အင်းဝ တပ်မှူးဖြစ်သော စည်သူကျော်ထင် တပ်နှင့် မင်းရဲကျော်စွာတပ်တို့ နှစ်ဘက် အပြင်းအထန် တိုက်ကြရာ ဒုတိယမင်းခေါင် အားကိုးရသော စည်သူကျော်ထင်မှာ ထိုတိုက်ပွဲတွင် ကျလေသည်။ 

သက်တော်ရှည်အမတ် ရာဇသင်္ကြန်လည်း စစ်အင်အားအလုံးအရင်းဖြင့် စစ်ကူလာသဖြင့် မင်းရဲကျော်စွာ လည်း တပ်ကို ဆုတ်ကာ ရမည်းသင်းမြို့ သို့ ၀င်ပြီး လက်နက်စိန်ပြောင်းတို့ဖြင့် ထူထူထပ်ထပ်ချကာ အင်းဝတပ် မြို့နား မကပ်နိုင်အောင် စိန်ပြောင်းတို့ကို အဆက်မပြတ် ပစ်စေလေ၏။ အင်းဝတပ်များ နှစ်လ တိုင်အောင် မြို့ နား မကပ်နိုင်သဖြင့် ဒုတိယမင်းခေါင်မှ တပ်များကို အင်းဝသို့ ပြန်လာရန် အမိန့်တော် ထုတ်လေသည်။ 
Share:

No comments:

Post a Comment