မင်တရုတ်များ ထပ်မံချီတက်လာခြင်း

သက္ကရာဇ် ၈၁၁ (အေဒီ ၁၄၄၇) တွင် မင်တရုတ်ဧကရာဇ်မှ မောပြည်အပိုင် (ရှမ်း) ဖြစ်သည့် မိုးကောင်း၊မိုးညှင်း တို့ကို သိမ်းပိုက်ရန် အမိန့်ထုတ်ကာ စစ်သည်အင်အား တစ်သိန်းသုံးသောင်း ကျော်ဖြင့် ယူနန်နယ်မှ တစ်ဆင့် ချီတက်လာလေ၏။ မိုးကောင်းမြို့ ကို ရောက်ရန် ဧရာဝတီကို ကူးရမည်ဖြစ်ရာ မင် တရုတ်များ ဧရာဝတီမြစ်ကို တံတားဖွဲ့ပြီး ရှစ်နေ့တိတိ ကူးရလေ၏။ 


ထိုသို့ ကူးနေသည်ကို မိုးကောင်းစော်ဘွား၏ ကင်းလှည့်တပ်များ တွေ့သဖြင့် သတင်းပေးပို့ရာ မိုးကောင်းစော်ဘွားမှ မိုးညှင်းစော်ဘွားကို သတင်းပေးပြီး စော်ဘွားနှစ်ပါး တပ်ပူးပေါင်းပြီး တရုတ်တပ်များကို ဆီးကြို တိုက်ခိုက်လေ၏။ မိုးကောင်း၊မိုးညှင်း ပူးပေါင်းတပ်မှ တရုတ်များကို ဆီးကြို တိုက်ခိုက်လေရာ တရုတ်တပ်များ ပျက်ပြီး ဆုတ်ရလေ၏။ ထိုသို့ တရုတ်တပ်များ ပျက်ပြီး ဆုတ်သွားရ ကြောင်း အင်းဝနရပတိမှ သတင်းရလျှင် မိုးကောင်းနှင့် မိုးညှင်း စော်ဘွား နှစ်ပါးကို ဂုဏ်ပြုသော အားဖြင့် ရွှေငွေ လက်ဆောင်တော်များ ပို့ဆောင်လေ၏။ 

သက္ကရာဇ် ၈၁၂ အရောက်တွင် မိုးညှင်းစော်ဘွား နတ်ရွာစံပြီး သားတော် အိမ်ရှေ့မှ စော်ဘွားအဖြစ် သို့ ရောက်လေ၏။ စော်ဘွားအဖြစ်သို့ ရောက်သော် အင်းဝကိုတိုက်ခိုက်ရန် နန်းတော်တွင် ဆွေးနွေးရာ အင်းဝ မှလွှတ်ထားသော သူလျှိူ မှ ကြားသိသဖြင့် အင်းဝသို့ သတင်းပို့လေသည်။ အင်းဝ နရပတိလည်း စုံစမ်းခြင်း မပြု တော့ဘဲ အိမ်ရှေ့မင်းသားကို ခြေလျင် စစ်သည် ခုနှစ်သောင်း၊ တိုက်ဆင် လေးရာ၊ မြင်း ရှစ်ထောင်ဖြင့် မိုးညှင်းကို သိမ်းပိုက်စေလေ၏။ 

ဘုရင်နရပတိကိုယ်တော်လည်း ရေတပ်အင်အား တစ်သိန်းကျော်ဖြင့် မြစ်မှ တစ်ဆင့် ချီတက်လေသည်။ ထိုသို့ ရုတ်တရုက် အင်းဝမှ စစ်အင်အား အကြီးအကျယ်ဖြင့် ချီတက်လာနေသည်ကို မိုးညှင်းစော်ဘွားမှ စုံစမ်းလေရာ မိမိမြို့ ကို တိုက်ရန် အကြောင်းသိရသဖြင့် အလျင်အမြန် စစ်ပြင်ဆင်ပြီး မိုးကောင်းစော်ဘွားကို လည်း စစ်ကူခေါ်လေသည်။ 

အင်းဝအိမ်ရှေ့မင်း၏ တပ်များသည် မိုးညှင်းမြို့ အပြင်တွင် ဆီးကြို နေသော မိုးညှင်းစော်ဘွား၏ တပ်များ နှင့် အပြင်းအထန် တိုက်ကြရာ မိုးညှင်းစော်ဘွားမှာ ထိုတိုက်ပွဲတွင် ကျလေ၏။ စော်ဘွားကျ ပြီး မိုးညှင်းမြို့ လည်း အင်းဝအောက်ရောက်ပြန်လေ၏။ ထိုစဉ် စစ်ကူအဖြစ် ချီတက်လာသော မိုးကောင်းစော်ဘွား သည် မိုးညှင်းစော်ဘွားကျသော သတင်းကို ကြားပြီး အင်းဝ နှင့် စစ်မတိုက်တော့ဘဲ အင်းဝဘုရင် နရပတိထံ သံစေလွှတ်ပြီး မိမိမှာမူ မိုးကောင်း သို့ ပြန်လေ၏။

(မှတ်ချက်။  ။ မင်တရုတ်သည် အခွင့်ရလျှင်ရသလို မောပြည်ဖြစ်သော မိုးကောင်း၊မိုးညှင်းကို အစဉ်အမြဲ ချီတက်တိုက်ခိုက်လေ့ရှိသည်၊ ရှမ်းသမိုင်းတွင် ယခင်က ယူနန်နယ်ကို ရှမ်းမျိူးနွယ်များကသာ စိုးမိုးရာ တရုတ်မှ တိုက်ခိုက်အောင်နိုင်ပြီး ယူနန်ကို သိမ်းပိုက်ခဲ့ပြီး ထို ယူနန်ရှိရှမ်းမျိူးနွယ်စုများနှင့် တိုက်ခိုက်ရခြင်းအကြောင်းများ ကို မှတ်တမ်းတင်လေ့ရှိသည်။ မင်တရုတ်ဧကရာဇ်မှ ယူနန်အနွယ်ရှမ်းမျိူးနွယ်များအားလုံးကို တရုတ်လက်အောက်တွင် ထားချင်ဟန်ရှိ၏။ ထိုကြောင့် ယူနန်မှ  (ယခုကချင်ပြည်နယ်) (ရှမ်းပြည်နယ်) တွင် မြို့များ ထူထောင်ကာ နေထိုင်သော လက်ကျန် ရှမ်း (တိုင်) မျိူးနွယ်စုများကို အခွင့်ရလျှင် တိုက်ခိုက်သိမ်းပိုက်လိုခြင်းဖြစ်သည်။ )
Share:

No comments:

Post a Comment