အင်းဝ နှင့် ဟံသာဝတီ စစ်ပွဲ

ရာဇာဓိရာဇ် မြစ်မှ စုန်ဆင်းပြီဟု ဘုရင်မင်းခေါင်ကြားလျှင် အရေးပေါ်ညီလာခံခေါ်ပြီး ဟံသာဝတီဘုရင်ကို တိုက် ရန် မတိုက်ရန် ဆုံးဖြတ်ကြလေသည်။ နန်းတော်ညီလာခံတွင် စစ်တိုက်ဖို့အတွက် အမတ်အများစုက သဘောတူသဖြင့် ဘုရင်မှ မြင်းစစ်သည် ၃ ထောင်ကျော်ကို ဟံသာဝတီတပ်များ ကမ်းစပ်တစ်လျှောက် မကပ် ရန် ကပ်သည်နှင့် တိုက်ရန် အမိန့်တော်ပြန်လေသည်။

စကြိုသူမြတ်၏ ငြိမ်းချမ်းရေးကို ဘုရင့်နန်းတော်မှ လျစ်လျူရူပြီး ဟံသာဝတီတပ်များကို တိုက်ခိုက်ရန် အမိန့်ပြန်ခြင်းကြောင့် စကြိုသူမြတ်မှာ များစွာ စိတ်ဆင်းရဲရလေသည်။ အင်းဝ စစ်သည်တို့လည်း မြစ်ကမ်း တစ်လျှောက် ဒုန်းစိုင်း စီးပြီး ဟံသာဝတီလှေတပ်ရှိရာကို အပြင်းစိုင်းနှင်းလေသည်။ ပုဂံမြို့ သို့ ရောက်သော် ဟံသာဝတီဘုရင်က လှေတပ်ကို မြစ်ကမ်းနား ကပ်ရန် ပြုလေသည်။ သို့သော် ကုန်းပေါ်တွင် အင်းဝတပ်များ လည်း ရောက်နှင့်နေသောကြောင့် ကမ်းမကပ်ဘဲ ထပ်ပြီး စုန်ဆင်းလေသည်။

ထိုအချိန်တွင် ပြည်အနီးတွင် တပ်အများဖြင့် ထားခဲ့သော် ရာဇာဓိရာဇ်၏ သမက်တော်ကွပ်ကဲသည့် ခံတပ်ကို ပြည်မြို့စား နှင့် စလင်းစား ပေါင်းထားသည့် တပ်များက ၀င်ရောက် တိုက်ခိုက်ကြလေသည်။ သမက်တော်မှာ ထိုးစစ်ဒဏ်ကို မခံနိုင်ဘဲ မြင်းဖြင့် ထွက်ပြေးလေသည်။ ရာဇာဓိရာဇ်၏ သမီးတော် ကို အင်းဝတပ် တို့ ရလေရာ ဘုရင်မင်းခေါင်သို့ ပို့ဆောင်ကြလေသည်။

ရာဇာဓိရာဇ်လည်း ထိုသတင်းကို ကြားလျှင် ဟံသာဝတီသို့ အပြင်းစုန်ပြီး ဒေါသအလျောက် သမက်တော်ကို သေဒဏ်ပေးလေသည်။ ဟံသာဝတီဘုရင်လည်း စစ်သည်အင်အား ပြန်လည် စုရုံးပြီး အလွဲမြို့၊ ဂူထွတ်မြို့ တို့ကို အပြင်းအထန် တိုက်လေသည်။ အလွဲမြို့ နှင့် ဂူထွတ်မြို့ တို့ ဟံသာဝတီဘုရင်လက်အောက် ရောက်လေသည်။

ရာဇာဓိရာဇ်လည်း ပြည်မြို့ကို ထပ်မံ တိုက်ခိုက်ပြန်လေသည်။ အင်းဝဘုရင်က ဂတိဖျက်တာ တကြောင်း၊ သမီးတော်က ရန်သူတော် လက်တွင်း ရောက်နေသည်က တကြောင်း ထိုသို့သော အကြောင်းများကြောင့် ရာဇာဓိရာဇ်မှာ အလွန်ဒေါသထွက်လျက် အင်းဝပိုင်နက် မြို့များကို တစ်မြို့ပြီး တစ်မြို့ သိမ်းရန်သာ တာစူ နေတော့သည်။

ပြည်မြို့ကို တိုက်ခိုက်ရာ ပြည်မြို့တွင်းမှ လက်နက်ကြီးငယ်များဖြင့် အပြင်းအထန် ခုခံသဖြင့် မြို့အနီး မတက် နိုင်ဘဲ ဟံသာဝတီတပ်များလည်း မြို့ကို ၀ိုင်းရံထားလေသည်။ နှစ်လကြာသော် ပြည်မြို့တွင်းရှိ ရဲမက် များမှာ အစာရေစာ မလုံလောက်သဖြင့် ငတ်မွတ်ကြလေသည်။

ဘုရင်မင်းခေါင်လည်း မြို့လှစား ကို ရုပ်ဖျက်စေပြီး ညအခါတွင် ပြည်မြို့အတွင်းသို့ ခိုးဝင်စေကာ အစာရေစာ များကို တင်သွင်းလေသည်။ ပြည်မြို့ရဲမက်တို့လည်း အစာများ ပြန်လည် ၀၀လင်လင် စား သောက်ရလေသည်။ ထိုအချိန်တွင် အင်းဝဘုရင်လည်း စစ်သည်အများဖြင့် ပြည်သို့ ချီတက်လာ နေသည့် အချိန်ဖြစ်လေသည်။



Share:

No comments:

Post a Comment