နရသူမင်း အပိုင်း(၁) မင်းဖြစ်ရန် နောင်တော်ကို သတ်ခြင်း

အလောင်းစည်သူမင်း နတ်ရွာစံပြီးနောက် ပုဂံပြည်ကို သားတော် နရသူက စတင်အုပ်စိုးလေသည်။ သို့သော် အဝေးမှာ နေထိုင်နေသော နောင်တော်မင်းရှင်စောသည် ခမည်းတော်နတ်ရွာစံသည်ဟု ကြားသော် စစ်သူရဲမက်ဖြင့် ပုဂံသို့ ချီတက်လာလေသည်။ ထိုအကြောင်းကို နရသူကြားသော် ယုတ်မာသော အကြံကို ကြံလေသည်။ ထိုခေတ်တွင် ပုဂံပြည်မှာ သီလဂုဏ်တို့ဖြင့် ထင်ရှားကျော်ကြားလျက်ရှိသော ပံ့သကူမဟာထေရ် ဆီကို နရသူက ချဉ်းကပ်ပြီး နားတော်လျှောက်လေသည်။


“ အရှင်ဘုရား နောင်တော်မင်းစောသည် ခမည်းတော်မရှိဘိဟု ကြားလျှင် ရေအားဖြင့် ကြည်းအားဖြင့် ချီတက်လာလေပြီ၊ နေပြည်တော်သို့ ရောက်သော် စစ်မက်တွေ ဖြစ်ပွားလျှင် ပြည်သူတို့ ဆင်းရဲကုန်လိမ့်မည်။ နောင်တော်ကို ဓားတစ်စင်း၊မြင်းတစ်စီးဖြင့် နန်းတော်သို့ဝင်လျှင် အကျွန်ုပ် နောင်တော်ကို နန်းအပ်ပါ့မည် ဟု သတင်းစကား ပါးပေးတော်မူပါ။” ဟု လျှောက်တင်လေ၏။
ရဟန်းတော်လည်း နရသူကို မယုံသဖြင့် လက်မခံပေ။ ထိုအခါ နရသူမှ သစ္စာဆိုပြီး နောင်တော်ရောက်လျှင် ဓားထမ်းပြီး နန်းတင်ပါ့မည်ဟု သစ္စာဆိုလေ၏။ ရဟန်းတော်လည်း သစ္စာဆိုသည်ကို ယုံတော်မူသဖြင့် မင်းရှင်စော ရှိရာ ကြွပြီး နရသူ ပါးသော စကားကို ဆိုလေသည်။

မင်းရှင်စောလည်း ရဟန်းတော်စကားကို ယုံသဖြင့် ဓားတစ်လက်ဖြင့် ရွှေလှေပေါ်တွင် ရဟန်းတော်ကို တင်ပြီး တစ်ကိုယ်တည်းကြွလာလေသည်။ လှေဆိပ်သို့ရောက်လျှင် နရသူလည်း သစ္စာဆိုသည့်အတိုင်း နောင်တော်ဓားကို ထမ်းပြီး နောင်တော်ကို ဆင်ပေါ်တင်စေလျက် ပြည်သူအများရှေ့တွင် ဘိသိက်ခံ စေလေသည်။ ထိုညတွင် စားပွဲသောက်ပွဲ ကျင်းပလေရာ စားတော်တွင် အဆိပ်ခတ်ပြီး နောင်တော်ကို သေစေလေသည်။ နောင်တော်သေသော် နရသူသည် ချက်ချင်း ထီးနန်းကို သိမ်းပြီး နောင်တော်မင်းရှင်စော၏ တပ်မှူးများကို ဖမ်းစေရာ မင်းရှင်စော၏ တပ်မှာ ဖရိုဖရဲ ဖြစ်ကုန်လေသည်။

နရသူမင်းဖြစ်သော် ပံ့သကူမထေရ်လည်း နန်းတော်သို့ သွားပြီး “ မင်းဆိုး၊မင်းညစ် သံသရာဝယ် ခံအပ်သော ဒုက္ခကို မကြောက်သလော၊ စည်းစိမ်ကား သင့်သေလျှင် ပါမသွား၊ ယုတ်မာပြီး အသက်ရှင်တာထက် သေတာက မြတ်သေးသည်၊ သင့်ထက် ယုတ်သော မင်းကား လောကတွင် မရှိတော့ပြီ” ဟု ဆိုလေသော်၊ နရသူကလည်း “ အရှင်မြတ်ထံ သစ္စာဆိုသည့်အတိုင်း ကျွန်တော်ထီးနန်းတင်ခဲ့ပါသည် သစ္စာကို မဖောက်ခဲ့ပါ” ဟု ပြန်လျှောက်လေသော် ရဟန်းတော်လည်း ပုဂံတွင် သီတင်းမသုံးတော့ဘဲ သိန်းခိုကျွန်းသို့ ကြွရောက်လေသည်။
Share:

No comments:

Post a Comment